Espalazio-egitura zertarako?

Aurrekoan ikerketa-egitura txiki eta bikainen egokitasuna kantatu nuen. Susmo batzuk haizatu egin nituen; megaegitura ba omen zetorrela! Eta badator. Zurrumurru-mailan zebilena, Eusko Jaurlaritzak argitaratutako 'Zientzia eta Berrikuntza-sistemaren Liburu Zurian' aditzera ematen zena, urratsak egiten hasi da. Mamutzarrak badu jada izena. Oraindik orain, urriaren 24an, Eusko Legebiltzarreko PSE-EEren taldea ez-legezko proposamena aurkeztu du: Eusko Jaurlaritzari eskatzen dio urratsak egin ditzala Bizkaian espalazio bidezko neutroi-iturria izango duen instalazioa kokatzeko. Makroinstalazio horrek Guggenheimen moduko eragina izango lukeela aipatzen da eta hoteletan eguneko 100 ikerlari/tekonologo egongo liratekeela. Zer nahi duzue esatea? Baserritar akonplejatuaren arrazoiak direla.
300 milioi euroko inbertsioa omen da egin beharrekoa. Felix Goñi Eusko Jaurlaritzako Zientzia Politikarako zuzendaria izandakoaren hitzak usatuko ditut kirtenkeriaren tamaina adieazteko: '300 milloiko zentro bat bizi al da inguruan, 30 milioiko 10 zentro badauzka eta 30 milioiko zentro batek irauten du ingurutan 3 milioiko 10 zentro baldin baditu. 30 milioiko zentrorik ez dugu Euskal Herrian eta 3 milioiko mailako oinarrizko ikerketa egiten duten bi zentro baino ez ditugu' Goñik esan nahi egin nahi denaren moduko zentroak garapen zientifiko eta teknologiko oso handiko eremuetan eraikitzen direla, hor direla eraginkorrak jadanik oinarria egina dutelako. Bat nator analisi horrekin. Nire ikuspegitik bidea 3 milioiko zentroak ugaritzea da, 30 milioiko zentroen oinarria ipintzen joateko eta azkenik etorriko da erraldoia, buztinezko oinak ez dituenean.
Gure zientzialaririk nazioartekoena esaten du Euskal Herrian ez dela epe motzean Nobel saridunik egongo ez dagoelako nahikoa ikerlari- eta bikaintasun-dentsitaterik (nik eransten diot hemen ez dela biziko ados nagoela, baina munduan zehar dugun horietako zientzialari bikainetakoren bat toki egokian eta une egokian egon daitekeela). Bada irizpide bera aplika dakieke ikerketa-instalazioei, gutxi dagoen tokietan (tradizioz zein kopuruz) ezin da bikaintasunezko erraldoia eraiki egun batetik bestera munduko diru guztia mahaiaren gainean jarrita ere. (jarraitzeko)